२४ घण्टामा देशभर ३१ विपद्का घटना: एक जनाको मृत्यु, १६ घाइते

काठमाडौँ । पछिल्लो २४ घण्टामा देशभर भएका विभिन्न प्रकृतिका ३१ विपद्का घटनामा एक जनाको मृत्यु भएको छ भने १६ जना घाइते भएका छन्। घटनामा ११ वटा चौपाया मरेका वा घाइते भएका छन् भने करिब २३ लाख १८ हजार ४०० रुपैयाँ बराबरको आर्थिक क्षति भएको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार असोज २३ गते बिहान १० बजेदेखि असोज २४ गतेसम्म देशका २९ स्थानमा विपद्का घटना भएका हुन्।

प्राधिकरणकी प्रवक्ता शान्ति महतका अनुसार उद्धार तथा राहत कार्यका लागि १२० जना प्रहरी परिचालन गरिएको छ। घाइतेहरूको सम्बन्धित क्षेत्रका अस्पतालमा उपचार भइरहेको छ। प्रारम्भिक विवरणअनुसार विपद्का घटनाबाट मानवीय क्षतिसँगै पशुचौपाया र भौतिक सम्पत्तिमा पनि नोक्सानी पुगेको छ।

मौसममा भइरहेको परिवर्तनका कारण विभिन्न स्थानमा विपद्को जोखिम बढ्न सक्ने भन्दै प्राधिकरणले सर्वसाधारणलाई सतर्क रहन आग्रह गरेको छ। जोखिम देखिएमा स्थानीय प्रशासन, सुरक्षा निकाय तथा सम्बन्धित निकायसँग समन्वय गरी सुरक्षित स्थानमा जान प्राधिकरणले अनुरोध गरेको छ।