तनहुँ जलविद्युत आयोजना: सात योजनाको निर्माण कार्य प्रगति र सामाजिक विकास कार्यक्रम

तनहुँ — तनहुँको ऋषिङ गाउँपालिका–१ झापुटारमा निर्माणाधीन १४० मेगावाट क्षमताको तनहुँ जलविद्युत आयोजना हालसम्म सात वटा योजनामा निर्माण कार्य प्रगति भएको जानकारी प्राप्त भएको छ। यस आयोजना मार्फत प्रभावित क्षेत्रहरूमा सामुदायिक उत्तरदायित्व अन्तर्गत विभिन्न विकासात्मक कार्यहरु भइरहेका छन्।

आयोजना प्रमुख श्यामजी भण्डारीले वैशाख महिनामा दुई वटा योजना सम्पन्न भएको जानकारी दिए। उनका अनुसार, म्याग्दे गाउँपालिका–३ स्थित किल्चोक शाखा सडकमा नाला निर्माण र ऋषिङ गाउँपालिका–१ होक्सेटारमा खानेपानी मुहान तथा पाइप सुधार योजना सफलतापूर्वक पूरा भएका छन्। यससँगै, हालसम्म प्रभावित क्षेत्रमा ९६ वटा योजना सम्पन्न भइसकेको भण्डारीले बताए।

आयोजनाको सामाजिक र आर्थिक विकासमा ध्यान केन्द्रित गर्दै प्रभावित क्षेत्रहरूमा उपभोक्ता समितिहरु मार्फत् सामुदायिक विकास तथा जीविकोपार्जन पुनर्स्थापना कार्यक्रम सञ्चालन भइरहेको छ। यी कार्यक्रम वातावरणीय तथा सामाजिक व्यवस्थापन सेवा प्रदायकबाट नियमित अनुगमन भइरहन्छ।

अहिले सञ्चालनमा रहेका प्रमुख निर्माण कार्यहरूमा ऋषिङ गाउँपालिका–७ स्थित माछदाङ टुनीबोट ट्रेल पुलसम्मको पहुँच सडक, भिमाद नगरपालिका–५ स्थित फेदीखोला मोटरेवल पुल, ऋषिङ गाउँपालिका–७ स्थित डाडीवन चुलेसी पहुँच मार्ग, सेती नदीमाथि चुलेसी, टुनीबोटे, ब्ल्याङ र टुटुवामा गरिने चारवटा झोलुङ्गे पुलका लागि लठ्ठा आपूर्ति र ढुवानी, भिमाद नगरपालिका–५ स्थित वानटाङ खोलामा पक्की पुल, म्याग्दे गाउँपालिका–५ स्थित सामुदायिक भवनको संरक्षणका लागि पर्खाल लगाउने कार्य र ऋषिङ गाउँपालिका–१ गैराखुदीस्थित दीपक माध्यमिक विद्यालय भवन निर्माण कार्य हुन्।

आयोजनाको सफलताका लागि समुदायको महत्वपूर्ण भूमिका रहेकोले सामाजिक कामलाई प्राथमिकता दिइएको छ। भण्डारीले भने, “समुदायसँग सहकार्य गर्दै आयोजना सम्पन्न गराउनेतर्फ हामी लागिपरेका छौं, विभिन्न सामाजिक काममा आयोजना बाट सहयोग जारी रहेको छ।”

आयोजनाको प्याकेज १ अन्तर्गत बाँध र संरचनाहरु, प्याकेज २ अन्तर्गत मुख्य सुरुङ, विद्युतगृह र सम्बन्धित उपकरणहरु, र प्याकेज ३ अन्तर्गत दमौलीबाट भरतपुर २२० केभी प्रसारण लाइनको काम भइरहेको छ। यस परियोजनाले स्थानीय विकास र विद्युत उत्पादनमा महत्वपूर्ण योगदान पुर्‍याउने अपेक्षा गरिएको छ।