अमेरिकी-इजरायली संयुक्त आक्रमण: सर्वोच्च नेता खामेनी सहित इरानका प्रमुख व्यक्तिहरूको मृत्यु

तेहरान — इरानको राजधानी तेहरानमा अमेरिक र इजरायलले संयुक्त रूपमा गरेको आक्रमणले ठूलो तहल्का मच्चाएको छ। यस आक्रमणमा इरानका सर्वोच्च नेता आयतोल्लाह अली खामेनीसहित देशका केही अति शक्तिशाली व्यक्तित्वहरूको मृत्यु भएको पुष्टि भएको छ।

इरानी सरकारी समाचार संस्था इर्नाले यस घटनामा सर्वोच्च नेताका प्रमुख राजनीतिक सल्लाहकार र प्रतिरक्षा परिषद्का सचिव अली सामखानी र इस्लामिक रिभोलुसनरी गार्ड कप्र्स (आईआरजीसी) का कमाण्डर-इन-चिफ मोहम्मद पाकपोरको मृत्यु भएको पुष्टि गरेको हो।

सञ्चारमाध्यमहरूले खामेनीलाई ‘शहीद’ को संज्ञा दिएर उनको मृत्युले देशलाई अतुलनीय क्षति पुर्‍याएको बताएका छन्। अमेरिकी राष्ट्रपति डोनाल्ड ट्रम्पले खामेनी मारिएको घोषणा गरेपछि केही घण्टा भित्रै इरानले पनि यसको आधिकारिक पुष्टि गरेको थियो।

ट्रम्पले खामेनीको उत्तराधिकारी को हुन सक्छ भन्नेबारे आफूलाई राम्रो योजना रहेको र आवश्यक परे थप आक्रमण जारी राख्ने चेतावनी दिएका छन्। यस भीषण आक्रमणमा खामेनीकी छोरी, ज्वाइँ र नाति समेतको ज्यान गएको बताइएको छ। घटनापछि इरानले ४० दिनको राष्ट्रिय शोक घोषणा गरेको छ।

सर्वोच्च नेताको मृत्युपछि इरानको संविधानअनुसार देश सञ्चालनका लागि नयाँ प्रक्रिया सुरु भएको छ। अब राष्ट्रको नेतृत्व राष्ट्रपति, न्यायपालिका प्रमुख र गार्डियन काउन्सिलका एक धर्मगुरु मिलेर गठन गर्ने प्रणाली लागू हुने भएको छ।

अर्कोतर्फ, इजरायलले यस घटनापछि इरानमाथि थप आक्रमणको तयारी गरेको घोषणा गरेको छ भने युएई र बहराइनमा पनि इरानविरोधी आक्रमण र प्रतिक्रिया सम्बन्धी विवरणहरू सार्वजनिक भएका छन्। यो घटनाले क्षेत्रीय र विश्वराजनीतिमा ठूलो प्रभाव पार्ने देखिन्छ, र यसले मध्यपूर्वको स्थिरता र सुरक्षा चुनौतीहरूलाई थप जटिल बनाउने संकेत गरेको छ।