काठमाडौं उपत्यकामा ट्राफिक व्यवस्थापन सुधार: ‘म्याजिक लाइट’ हस्तान्तरण

काठमाडौं — काठमाडौं उपत्यकाको रात्रिकालीन सवारी व्यवस्थापनलाई थप प्रभावकारी बनाउन काठमाडौं ट्राफिक प्रहरीलाई ‘म्याजिक लाइट’ हस्तान्तरण गरिएको छ। लायन्स क्लब अफ काठमाडौँ थलीले खरिद गरेको उक्त लाइटलाई सोमबार जिल्ला प्रशासन कार्यालयमा आयोजित कार्यक्रममा उपत्यका ट्राफिक प्रहरी प्रमुख एवं प्रहरी वरिष्ठ उपरीक्षक नवराज अधिकारीलाई हस्तान्तरण गरिएको हो।

म्याजिक लाइटको प्रयोगले अन्धारोमा ट्राफिक प्रहरीको उपस्थिति स्पष्ट देखिने र सवारी दुर्घटना न्यूनिकरणमा महत्वपूर्ण भूमिका खेल्ने विश्वास गरिएको छ। कार्यक्रममा प्रमुख जिल्ला अधिकारी इश्वरीप्रसाद पौडेलले लायन्स क्लबको यस सहयोगको प्रशंसा गर्दै, सडकमा ट्राफिक प्रहरी नदेखिँदा हुने ठक्कर र दुर्घटनाका घटना घट्ने सम्भावना कम हुने बताए। उनले भने, “काठमाडौँको सडकमा रातको समयमा ट्राफिक व्यवस्थापन चुनौतीपूर्ण छ, नयाँ प्रविधिले प्रहरीको कामलाई सहज बनाउनेछ।”

त्यसैगरी, लायन्स क्लब अफ थलीका अध्यक्ष रुपक सिमखडाले सामाजिक उत्तरदायित्व अन्तर्गत यो पहल गरिएको बताएर, आगामी दिनमा पनि यस्ता सहकार्य निरन्तरता पाउने विश्वास व्यक्त गरे। उनले भने, “सामाजिक र सामाजिक उत्तरदायित्व अन्तर्गत हामीले सडक सुरक्षा र ट्राफिक व्यवस्थापनमा सुधार ल्याउन यस्तो कदम चाल्यौं। हामीले यस्ता प्रयासहरू निरन्तर जारी राख्नेछौँ।”

उपत्यका ट्राफिक प्रहरी प्रमुख अधिकारीले जेनजी आन्दोलनका क्रममा ट्राफिक कार्यालयका भवन, उपकरण र प्रहरीका पोसाकसमेत जलेर ठूलो क्षति पुगेको जानकारी दिए। आन्दोलनले पुर्‍याएको भौतिक क्षतिका कारण व्यवस्थापनमा समस्या परिरहेको बेला नागरिक स्तरबाट भइरहेको सहयोग र पुनर्निर्माणका प्रयासले उत्साह थपिएको उनले बताए। “पाँच मिनेट मात्रै ट्राफिक सञ्चालन नभएको खण्डमा सडकको अवस्था कस्तो हुने होला भन्ने हामी सहजै अनुमान गर्न सक्छौँ,” उनले भने, “यो म्याजिक लाइटले ट्राफिक व्यवस्थापनमा नयाँ आशा जगाएको छ।”

यस पहलले काठमाडौं उपत्यकाको रात्रीकालीन ट्राफिक व्यवस्थापनलाई अझ प्रभावकारी र सुरक्षित बनाउने आशामा छ। यसले सवारी दुर्घटना न्यूनिकरण र सडक सुरक्षा प्रवर्द्धन गर्न महत्वपूर्ण भूमिका खेल्ने विश्वास गरिन्छ।