अर्घाखाँचीमा वेवारिसे अवस्थामा हातहतियार र विष्फोटक पदार्थ फेला

अर्घाखाँची — अर्घाखाँचीको शितगंगा नगरपालिका वडामा वेवारिसे अवस्थामा विभिन्न प्रकारका हातहतियार र विष्फोटक पदार्थ फेला परेको छ। जिल्ला प्रहरी कार्यालय अर्घाखाँचीका प्रमुख डिएसपी दिवस जिसीको नेतृत्वमा खटिएको गस्ती टोलीले आइतवार बिहान करिव १० बजे उक्त क्षेत्रको नम्बर ११ बोक्सेमा खोजतलास गरि ती सामग्रीहरू बरामद गरेको हो।

गस्ति टोलीले ग्रामिण क्षेत्रमा रहेको पुरानो कोही नबस्ने गोठ (थारो) भित्र छानबिन गर्दा विभिन्न प्रकारका खतरनाक सामग्रीहरू भेटिएको हो। उक्त स्थानबाट भरुवा बन्दुक २ थान, ग्रिनेट १४ थान, डेटोनेटर १२ थान, २५ इन्च लामो लन्चर जस्तो देखिने पदार्थ ३ वटा, ५ लिटरको प्रेशर कुकर र त्यसको भित्र रहेको बम १ वटा, स्टिलको डलु बम १ वटा, विजुलीको तारको ४ बण्डल र करिब ५०० ग्राम बारुद जस्ता खतरनाक सामग्रीहरू बरामद गरिएको छ।

प्रहरीले भनेको छ कि, भरुवा बन्दुक बाहेक अन्य सबै विष्फोटक पदार्थहरू नेपाली सेनाको सहयोगमा सुरक्षित रूपमा डिस्पोज गरिएको छ। यस कार्यवाहीमा नेपाली सेनाका साथै प्रहरी टोलीले पूर्ण सुरक्षा पूर्वक हातहतियार र विष्फोटक पदार्थहरूलाई नियन्त्रणमा लिएको हो।

प्रहरीले यस घटनाका विषयमा थप अनुसन्धान गरिरहेको र यस विषयमा आवश्यक कारबाही प्रक्रिया अघि बढाइने जनाएको छ। यस घटनाले क्षेत्रको सुरक्षा र शान्ति कायम राख्ने दृष्टिकोणले महत्वपूर्ण भूमिका खेल्ने देखिन्छ। यो खबर अर्घाखाँचीबाट प्रेमनारायण आचार्यको सहयोगमा प्राप्त भएको हो।