आत्मदाहको प्रयासपछि मृत्यु भएका पुरुषको परिचय खुल्यो – कारण अझै अनुत्तरित

काठमाडौँ। सर्लाहीको लालबन्दीमा आफ्नै शरीरमा आगो लगाएर आत्मदाहको प्रयास गरेका ५५ वर्षीय सूर्यप्रसाद पोखरेलको बुधबार बिहान उपचारका क्रममा मृत्यु भएको छ।

मङ्गलबार साँझ, पूर्वपश्चिम राजमार्गस्थित लालबन्दी नगरपालिका–७, डुमडुमे मन्दिर अगाडि पेट्रोल छर्किएर आगो लगाएका पोखरेललाई तत्कालै स्थानीयहरूले पानी र बालुवाले आगो निभाएका थिए। जलेर गम्भीर घाइते भएका उनलाई लालबन्दीको एक स्वास्थ्य संस्थामा सामान्य उपचारपछि थप उपचारका लागि मङ्गलबार राति ९ बजे प्रदेश राजधानी जनकपुरधामको प्रादेशिक अस्पतालमा ल्याइएको थियो।

उपचारकै क्रममा बुधबार बिहान करिब २ बजेतिर पोखरेलको मृत्यु भएको प्रहरी निरीक्षक वीरेन्द्रसिंह जोहारीले जानकारी दिए। मृतकको परिचय खुल्न सकेको छैन। मृतकको परिवार बुधबार बिहान मात्रै सम्पर्कमा आएको र उनी झापाबाट जनकपुरतर्फ प्रस्थान गरेको प्रहरीले जनाएको छ।

आत्मदाहको कारण अझै स्पष्ट हुन सकेको छैन। प्रारम्भिक जानकारीका अनुसार पोखरेल केही समयदेखि घरमा नबस्ने र मठ–मन्दिरमा बस्ने गरेको पाइएको छ। पोष्टमार्टमका लागि शव जनकपुरस्थित प्रादेशिक अस्पतालमा राखिएको छ। मृतकका आफन्तहरू अहिले झापाबाट जनकपुरका लागि प्रस्थान गरिसकेका छन्।

यस घटना सम्बन्धित थप अनुसन्धान भइरहेको प्रहरीले जनाएको छ।