सिमरा क्षेत्रमा आज पनि प्रदर्शन जारी, तनाव र कर्फ्यूको अवस्था

बाराको सिमरा क्षेत्रमा आज पनि प्रदर्शन जारी रहेको छ। नेकपा एमालेका कार्यकर्ता र जेनजी समूहबीचको विवादले बुधबार दिनभर तनावपूर्ण समय बिताएको सिमरामा आज पनि प्रदर्शन भएको हो।

तनाव बढेपछि जिल्ला प्रशासन कार्यालय बाराले बुधबार कर्फ्यू जारी गरेको थियो। तर, साँझ प्रहरी प्रशासन र युवाहरूबीचको सहमति भएपछि सडक सञ्चालनमा ल्याइएको थियो।

आफूहरूमाथि कुटपिट गर्ने एमाले नेता तथा कार्यकर्तालाई पक्राउ गर्न माग गर्दै बिहीबार बिहान १० बजेबाट जेनजी युवा समूहले सिमरा चोकमा टायर बालेर प्रदर्शन गरिरहेका छन्। प्रदर्शनका कारण सिमरा र आसपासका क्षेत्रका सामुदायिक तथा संस्थागत विद्यालयहरूको पठनपाठन बन्द भएको छ।

यस विवाद र प्रदर्शनले क्षेत्रको सामान्य जीवन प्रभावित भएको छ भने सुरक्षा व्यवस्था कडा बनाइएको छ। प्रहरीले आवश्यकतानुसार थप कदम चाल्ने तयारी गरेको छ।