जेन–जी आन्दोलनका माग पुरा गर्न र सरकारको विरोधमा ‘पहिला देश’ अभियानले कार्तिक १६ गते प्रदर्शनको घोषणा

काठमाडौँ — ‘पहिला देश (पिपुल्स रेभुलेसन) अभियान’ ले तत्कालीन प्रधानमन्त्री केपी ओली, गृहमन्त्री रमेश लेखक र सिडिओलाई पक्राउ नगरेको विरोधमा कार्तिक १६ गते आइतबार माइतीघरमा व्यापक प्रदर्शन गर्ने जनाएको छ। उक्त अभियानले यसअघि नै सरकारको भ्रष्टाचार र असंवैधानिक कार्यप्रति विरोध जनाउँदै सरकारको कदमको आलोचना गर्दै आएको छ।

शनिवार राजधानीको संवाद डबलीमा आयोजित पत्रकार सम्मेलनमा अभियानले आफ्नो माग सार्वजनिक गरेको हो। यस क्रममा अभियानले जेनजीको मागअनुसार सरकारले आवश्यक कदम नचालेको भन्दै आपत्ति जनाएको छ। साथै, अन्तरिम सरकारकी प्रधानमन्त्री सुशीला कार्कीको राजीनामासमेत माग गरिएको छ। अभियानका नेताहरुले वर्तमान सरकारलाई काम गर्न नसकेको र भ्रष्टाचारलाई निरुत्साहित गर्न आवश्यक कदम चाल्नुपर्ने माग गरेका छन्।

डाक्टर निकोलश भुसालले जेनजी आन्दोलन मुख्यतया सुशासन, भ्रष्टाचार मुक्त समाज, र कार्यकारी प्रमुखको लागि भएको बताएका छन्। उनले भने, “तर, वर्तमान सरकारले उल्टै दिशामा गएको छ। ओली र लेखकलाई गोली हान्न आदेश दिने र जेनजीलाई पक्राउ गर्नुपर्ने चाहिँ मुख्य प्राथमिकता हो। तर, सरकारले त्यसो नगरेकाले नै हामीलाई प्रदर्शन गर्न बाध्य बनाएको हो।” उनले थपे, “सरकारले अनुसन्धान र कारवाही गर्नुपर्ने हो, न कि आन्दोलनलाई दबाउने।”

अभियानका संयोजक एसपी शाहले भनें, “भोलि हुने प्रदर्शनमा जेनजी, लघुवित्त, सहकारी, मिटर ब्याज, बैंकलगायतका पीडितहरु संयुक्तरूपमा आवाज उठाउने छन्। सरकार पुरानै व्यवस्था र भ्रष्टहरूको संरक्षक भएको आरोप लगाउँदै यसको विकल्प खोज्नुपर्ने आवश्यक रहेको हाम्रो धारणा हो।” उनले सरकारको कार्यशैलीमा सुधार आवश्यक भएको र जनताको हितमा काम गर्न सरकारलाई दबाव दिनुपर्ने बताए।

संरक्षक तथा लघुवित्त पीडित सङ्घर्ष समितिका अध्यक्ष मनिराम ज्ञवालीले भने, “जेनजी आन्दोलनको आँधीहुरीबाट बनेको वर्तमान सरकार पनि केपी ओलीको भन्दा फरक छैन। त्यसैले, हामीले देशलाई सुरक्षित गर्न संविधान परिमार्जनको माध्यमबाट निकास खोज्नुपर्ने देखिन्छ।” उनले वित्तीय शोषणको अन्त्य गर्न र विशेष वित्तीय ऐन खारेज गर्न आवश्यक रहेको बताए। ज्ञवालीले राष्ट्र बैंक जस्ता मुख्य बाधक संस्थाहरूलाई पनि ध्यानाकर्षण गराउँदै, अहिलेको सरकारले जेनजीको मुख्य मर्मअनुसार देशलाई अघि बढाउनुपर्ने माग गरे।

जेन–जी रविकिरण हमालले भने, “आन्दोलनलाई हाइज्याक गरिएको छ र त्यसको फाइदा गलत व्यक्तिहरुले लिइरहेका छन्। यसले शहीद र घाइतेहरूलाई अपमानित गरेको छ। सुशीला कार्की सरकारको विस्थापन नै हाम्रो अन्तिम लक्ष्य हो।” उनले आन्दोलनलाई सही मार्गमा ल्याउन र भ्रष्टाचार विरुद्धको संघर्षलाई जारी राख्न जोड दिएका छन्।

यस प्रकार, ‘पहिला देश’ अभियानले सरकारको भ्रष्टाचार र अनियमितता विरुद्ध व्यापक जनआन्दोलनको तयारी गरिरहेको जानकारी दिएको छ। प्रदर्शनलाई सफल बनाउनका लागि अभियानले जनसमर्थन जुटाउने प्रयास जारी राखेको छ।