‘रोबोट फोन’ ल्याउँदै अनर, रोबोटिक आर्मले खिच्नेछ तस्बिर र भिडिओ

काठमाडौँ । चिनियाँ स्मार्टफोन ब्रान्ड अनरले रोबोट फोन घोषणा गरेको छ । हालै एक भिडिओ जारी गर्दै कम्पनीले रोबोटिक आर्म (यान्त्रिक अङ्ग) जडित क्यामेरा भएको ‘रोबोट फोन’को घोषणा गरेको हो ।

यो यस्तो अवधारणाको फोन हो, जसको पछाडिको भागबाट क्यामेरा बाहिर निस्किन्छ । र, स्वचालित रूपमा विभिन्न दिशाबाट तस्बिर तथा भिडिओ खिच्न सक्छ । कम्पनीले हालसम्म यस फोनको एउटा कम्प्युटर ग्राफिक्स (सीजीआई) मा आधारित भिडिओ मात्र सार्वजनिक गरेको छ । यसबारे थप विस्तृत जानकारी अर्को वर्ष बार्सिलोनामा आयोजना हुने ‘मोबाइल वर्ल्ड कङ्ग्रेस’ (एमडब्लूसी) मा दिइने अनरले जनाएको छ ।

सार्वजनिक गरिएको टिजर भिडिओ अनुसार यो फोन सामान्यभन्दा केही मोटो देखिन्छ र यसको पछाडि स्प्लिट क्यामेरा मोड्युल रहेको छ । अनरको परम्परागत लोगोको सट्टा ‘अल्फा’ लोगो प्रयोग गरिएको छ ।

यसले कम्पनीको ‘अल्फा प्लान’ नामक भविष्यको भिजनलाई सङ्केत गरेको छ । भिडिओमा क्यामेरा जडित रोबोटिक आर्म फोनबाट बाहिर निस्किएर विभिन्न कोणमा घुमेको देखाइएको छ । यसबाट फोनको उक्त आर्म स्वचालित रूपमा सञ्चालन हुन सक्ने देखिन्छ ।

कम्पनीका अनुसार ‘रोबोट फोन’को अवधारणाले भविष्यको फोनलाई एउटा उपकरण मात्र नभई एक ‘भावनात्मक साथी’ को रूपमा परिकल्पना गरेको छ । “यो फोनले एक रोबोट जस्तै प्रयोगकर्ताको आवश्यकतालाई बुझ्ने, त्यसअनुसार आफूलाई ढाल्ने र माया, आनन्द तथा ज्ञानले प्रयोगकर्ताको जीवनलाई समृद्ध बनाउनेछ,” अनरले एक विज्ञप्तिमा भनेको छ ।

यो परियोजना आर्टिफिसियल इन्टेलिजेन्सलाई आफ्ना उत्पादनमा इन्टिग्रेट गर्ने कम्पनीको बृहत् प्रयास अन्तर्गत पर्छ । अनरले आगामी पाँच वर्षभित्र आफूलाई एआई-केन्द्रित डिभाइस कम्पनीमा रूपान्तरण गर्न १० अर्ब डलर लगानी गर्ने योजना बनाएको छ । हाल कम्पनीले प्रयोगकर्तालाई ई-कमर्स साइटमा किनमेल गर्न, ट्याक्सी बोलाउन र फोटोग्राफीसम्बन्धी सुझाव दिन मद्दत गर्ने एआई उपकरण सार्वजनिक गरिरहेको छ ।

अहिलेसम्म यो फोनको कुनै वास्तविक प्रोटोटाइप भने देखाइएको छैन । कम्पनीले आगामी वर्ष एमडब्लूसीमा यसको बारेमा थप जानकारी र सम्भवतः वास्तविक हार्डवेयर नै प्रस्तुत गर्ने अपेक्षा गरिएको छ ।

रोबोटिक आर्ममा जडित क्यामेराको अवधारणाले फोटोग्राफी र भिडिओग्राफीमा नयाँ सम्भावना खोल्न सक्ने भए तापनि यसको टिकाउपन र उत्पादन लागतबारे भने प्रश्नहरू उठेका छन् । यसअघि ह्वावे लगायत अन्य विभिन्न स्मार्टफोन निर्माता कम्पनीले स्मार्टफोनमा पप-अप सेल्फी क्यामेरा प्रस्तुत गरेका थिए । तर, छिट्टै नै त्यस्तो क्यामेरा बिग्रिने भएपछि कम्पनीहरूले उत्पादन नै बन्द गरेका थिए ।