बक्यौता विवरण अद्यावधिक गर्ने समय पुस मसान्तसम्म, पुरानो जरिवाना मिनाहा हुने

काठमाडौं । वार्षिक विवरण नबुझाएका र खारेजी प्रक्रियामा जान बाँकी रहेका कम्पनीलाई विवरण अद्यावधिक गर्ने समय सरकारले दुई महिना थपेको छ। अब कम्पनीहरूले आगामी पुस मसान्तसम्म जरिवाना छुटसहित विवरण बुझाउन सक्नेछन्। यसअघि समयसीमा कात्तिक मसान्तसम्म तोकिएको थियो।

कम्पनी रजिस्ट्रारको कार्यालयका अनुसार आर्थिक वर्ष २०८२/८३ सम्म लाग्ने कर, शुल्क तथा दस्तुर बुझाएमा त्यसअघिका सबै आर्थिक वर्षको कर, शुल्क, दस्तुर र जरिवाना मिनाहा हुनेछ। रजिस्ट्रार कृष्णकुमारी श्रेष्ठले कम्पनी सञ्चालकलाई समयमै विवरण अद्यावधिक गरी जरिवाना मिनाहाको सुविधाबाट लाभ लिन आग्रह गरेकी छन्।

यसैबीच, मुलुकमा नयाँ कम्पनी दर्ता हुने क्रम बढेको छ। आर्थिक वर्ष २०८१/८२ मा २० हजार ७३६ कम्पनी दर्ता भएकामा आव २०८२/८३ मा २६ हजार २९१ कम्पनी दर्ता भएका छन्। अघिल्लो आर्थिक वर्षको तुलनामा गत आवमा ५ हजार ५५५ बढी कम्पनी दर्ता भएका हुन्।

रजिस्ट्रार श्रेष्ठका अनुसार चालु आवको कात्तिक १२ गतेसम्म १० हजार ४८० कम्पनी दर्ता भइसकेका छन्। विदेशबाट फर्किएका नेपालीले त्यहाँ आर्जन गरेको सीप, प्रविधि र पुँजी स्वदेशमै लगानी गरेर व्यवसाय सञ्चालन गर्न थालेकाले पनि कम्पनी दर्ता बढेको उनले बताइन्।

कम्पनी ऐन, २०६३ अनुसार कार्यालयले निजी तथा पब्लिक लिमिटेड र मुनाफा वितरण नगर्ने कम्पनीको स्थापना, दर्ता, प्रशासन, नियमन र खारेजीसम्बन्धी काम गर्दै आएको छ। कार्यालयले कम्पनीको सेयर संरचना तथा नाम परिवर्तन, प्रबन्धपत्र र नियमावली संशोधन, कम्पनी एकीकरण तथा गाभ्ने–गाभिने प्रक्रिया र सेयर तथा डिबेन्चरको अभिलेख व्यवस्थापन पनि गर्छ।

त्यसैगरी, कम्पनीहरूले कानुनअनुसार काम गरे वा नगरेको तथा आवश्यक कागजात र वार्षिक विवरण बुझाए वा नबुझाएकोबारे कार्यालयले अनुगमन गर्दै आएको छ।

कार्यालयमा हालसम्म ३ लाख ८८ हजार ६९० कम्पनी दर्ता भएकामा १४ हजार ९७० कम्पनी खारेज भएका छन्। कार्यालयले कम्पनीका वास्तविक धनीको विवरण सङ्कलन र व्यवस्थापन गर्नुका साथै कानुनअनुसार सञ्चालन हुन नसकेका वा बन्द गर्न चाहेका कम्पनीको खारेजी प्रक्रिया अघि बढाउँछ।