रौतहटमा अज्ञात समूहको गोली प्रहारबाट युवक घाइते, अवस्था गम्भीर

काठमाडौं । रौतहटको गौरमा अज्ञात समूहले गोली प्रहार गर्दा एक युवक घाइते भएका छन्।

जिल्ला प्रहरी कार्यालय रौतहटका अनुसार गौर नगरपालिका–४, गढवा टोलस्थित पानी ट्यांकीनजिक गएराति सवा ९ बजे स्थानीय २८ वर्षीय राकेश यादवमाथि गोली प्रहार भएको हो। घाइते यादवलाई तत्काल उद्धार गरी प्रादेशिक अस्पताल गौर लगिएको थियो। त्यहाँबाट थप उपचारका लागि उनलाई वीरगञ्जस्थित नेपाल मेडिसिटी बयोधा अस्पताल पठाइएको प्रहरीले जनाएको छ। उनको अवस्था गम्भीर रहेको छ।

प्रहरीका अनुसार यादवको ढाडमा तीन, दाहिने पाखुरामा एक र दुवै खुट्टामा दुई गरी गोलीका छर्रा लागेका छन्। घटनास्थलबाट ७.६२ एमएम पेस्तोलका तीनवटा खोका फेला परेको प्रहरीले जनाएको छ। यादवमाथि कसले र किन गोली चलाएको भन्ने खुल्न सकेको छैन। घटनाबारे थप अनुसन्धान भइरहेको प्रहरीले जनाएको छ।