लघुवित्त पीडितहरुको सामूहिक अनसन, सरकारको ध्यानाकर्षणका लागि सडकमा

काठमाडौं – लघुवित्त पीडितहरुले सरकारले सर्वोच्च अदालतको परमादेश कार्यान्वयन नगरेको प्रति आक्रोश व्यक्त गर्दै माइतीघरको सडक किनारमा सामूहिक अनसन थालेका छन्। मंगलबारदेखि सुरु भएको अभियानमा करिब डेढ सय पीडित सहभागी भए पनि हाल ४२ जना पीडितले अनसनमा बसेका छन्। बाँकी पीडितहरु सडकमै खाना खाँदै र त्रिपाल, प्लास्टिकको ओट लियेर रात बिताइरहेका छन्। कतिपयले भने ओत समेत पाएका छैनन्।

सामूहिक अनसनका क्रममा पीडितहरुले ट्रिपाल र प्लास्टिकमा ओत लाग्ने प्रयास गरे पनि केहीले भने रात बिताउन सक्नुभएको थिएन। उनीहरु पसलका सटर अगाडि पेटीमा परेर रुझ्दै बसेका देखिन्थे। उनीहरुको मुख्य माग भनेको सरकारले सर्वोच्च अदालतको परमादेशलाई तुरुन्त कार्यान्वयन गर्ने हो। सर्वोच्चले सरकार, नेपाल राष्ट्र बैंक र लघुवित्त बैंकर्स संघलाई समस्या समाधान गर्न निर्देशन दिएको अवस्थामा पनि ती निकायहरुले चासो नदेखाएको पीडितहरुले गुनासो गरेका छन्।

लघुवित्त तथा वित्तीय शोषणविरुद्ध संघर्ष समितिका अध्यक्ष मनिराम ज्ञवाली लगायत विभिन्न जिल्लाबाट आएका प्रतिनिधिहरु पीडितहरुको प्रतिनिधित्व गर्दै अनसनमा बसेका छन्। उनीहरु देशभरिबाट काठमाडौंको माइतीघरमा जम्मा भएर आफ्नो समस्या सुनाएका हुन्। उनीहरुले चामल, ग्याँस सिलिन्डरदेखि सिरक डस्ना समेत बोकेर ल्याएका छन्। लामो समयदेखि आन्दोलन जारी रहँदा पनि सरकारबाट समाधान नपाएपछि पीडितहरुले निरन्तर आन्दोलन गर्ने निर्णय गरेका छन्।

उपाध्यक्ष मिनप्रसाद चौलागाईंले भने, “हामीले समस्या समाधान नभएसम्म आन्दोलन जारी रहनेछ। सरकारले हाम्रो मागलाई ध्यानमा राख्नुपर्छ।” पीडितहरुको यो आन्दोलनले सरकार र सम्बन्धित निकायहरुको ध्यानाकर्षण गराएको छ र उनीहरुको माग पूरा नगरेसम्म आन्दोलन जारी रहने बताइएको छ।