काठमाडौंमा २४ घण्टामा २,०१० सवारी चालकलाई ट्राफिक नियम उल्लंघनमा कारबाही

काठमाडौँ — पछिल्लो २४ घण्टामा काठमाडौं उपत्यका ट्राफिक प्रहरी कार्यालयले २,०१० सवारी चालकहरूलाई विभिन्न ट्राफिक नियम उल्लंघनको आरोपमा कारबाही गरेको जानकारी दिएको छ। यस कार्यवाहीबाट करिब २१ लाख १० हजार ५१४ रुपैयाँको राजस्व संकलन भएको छ।

प्रहरीका अनुसार, मादकपदार्थ सेवन गरी सवारी चलाउने ८९ जनालाई पक्राउ गरी कारबाही गरिएको छ। त्यस्तै, नियमविपरीत ‘राइड सेयरिङ’ गरेको १०८, सङ्केत बत्ती उल्लङ्घन गरेका ९९ र तीव्र गतिमा सवारीसाधन चलाउने ८३ चालकलाई पनि मुद्दा तोकेको हो।

अर्कोतर्फ, लेन अनुशासन पालना नगर्ने ५९, निषेधित क्षेत्रमा हर्न बजाउने १००, लागुपदार्थ सेवन गरी सवारी चलाउने दुई जना, एकतर्फी सडकमा सवारी सञ्चालन गर्ने ७८ र अन्य विभिन्न ट्राफिक नियम उल्लङ्घन गरेका १,४८४ चालकहरूलाई पनि कारबाही गरिएको छ।

प्रहरीका अनुसार, यस प्रकारको सवारी नियम उल्लंघनलाई रोक्न र ट्राफिक व्यवस्था कायम गर्न थप कडाइ गरिनेछ। ट्राफिक नियमको पालना गरेर सुरक्षित यात्रा गर्न सर्वसाधारणलाई आग्रह गरिएको छ।